Montes de Guillade

O pásado sábado comezamos a limpar o monte na zona coñecida como da presa dos muíños, enriba do barrio da Encostada, en Guillade de Arriba. Esa presa recolle as augas que baixan desde o Coto dos Santos por un pequeno regato agachado entre salgueiros e carballos. Hai uns dez anos que se plantaron nesa zona carballos americanos, nunha extensión dun par de hectáreas.

Pero o lume que arrasou hai tres anos o monte de Guillade levou con el a beleza deste lugar. Dende aquela, xa retoñaron os carballos, alimentados polos nacentes de auga que existen aquí, e a zona volve recuperar a súa frescura. Pero ao mesmo tempo tamén naceron entre as árbores un toxo e unhas silvas que son agora máis altos que as persoas, e que ameazan de novo con chamar polo lume.

Así que organizamos un grupo de voluntarios e voluntarias para limpar esta zona do monte. Todos os sábados, das 6 da tarde en diante, xuntámonos ao pe da presa e imos limpando pouco a pouco os toxos e silvas. Dá gusto ver os carballos outra vez limpos,  agora que deixan ver os seus gomos novos, e moitos xa pasan dos dous ou tres metros de altura. Deste xeito queremos recuperar o verde luminoso do lugar e convertelo nunha zona de recreo e nun lugar encantado para o paseo e o lecer.

Desde este foro convocamos a todos aqueles e aquelas aos que a súa sensibilidade pola beleza do monte non lles permita quedarse cos brazos cruzados, especialmente os máis novos e novas do lugar, para que nos acompañen neste labor.

Queda moito por facer, pero con bo ánimo e cun labor tranquilo pero constante, como o das formigas ou o das abellas, o traballo vese  recompensado con creces só polo feito de poder ver as árbores medrar, e máis aínda se pensamos que algún día poderemos dicir que esas árbores que nos acollen e nos protexen do sol creceron ao abrigo da nosa mirada.

Esperámosvos no monte, que tamén é voso.

De PresaMuiños

Na parroquia de Guillade, concello de Ponteareas, sendo as 17:00 horas do día 5 de abril de 2009, en segunda convocatoria, e coa asistencia de 31 comuneiros e comuneiras, iníciase a asemblea xeral ordinaria da Comunidade de Montes Veciñais en Man Común de Guillade, coa seguinte orde do día:
Punto 1º: Lectura e aprobación, se procede, da acta anterior.
Punto 2º: Estado das contas.
Punto 3º: Aprobación da asemblea para solicitar subvencións.
Punto 4º: Admisión de novos comuneiros e comuneiras.
Punto 5º: Rogos e preguntas

Iníciase a asemblea xeral ordinaria dando lectura á acta da asemblea anterior, sendo aprobada por unanimidade.

A continuación o tesoureiro presenta o estado das contas pertencentes ao ano 2008, sendo aprobadas por unanimidade.

Seguidamente, e en relación ao punto terceiro da orde do día, referente á autorización da asemblea para que a Xunta Rectora e o seu Presidente poidan solicitar axudas e subvencións oficiais, tamén é outorgada por unanimidade.

En relación co punto cuarto da orde do día preséntanse dúas novas admisións de comuneiros/as, que son aprobadas pola asemblea para formar parte do rexistro de comuneiros/as, por reunir os requisitos esixidos.

A continuación, o presidente solicita autorización da asemblea para, de ser o caso, poder presentar denuncias ou emprender accións xudiciais en defensa dos intereses da comunidade de montes, séndolle concedida por unanimidade.

O presidente informa dos seguintes asuntos:

1. En relación coa venda prevista dos piñeiros da zona de Albelle, só se venderon os piñeiros secos, por un valor de 1250 €, xa que o prezo da madeira está moi baixo e non valeu a pena vender tamén os verdes. Esperarase a un mellor momento.

2. En relación coas plantacións de árbores, este ano plantouse un rodal de castiñeiro de 1,3 hectáreas e 815 prantas nunha zona contra os lindes de Uma. Solicitáronse 3 hectáreas máis na mesma zona, esta vez de carballo americano e carballo do país.

3. En relación coa venda de 30 piñeiros arredor da nave de Albelle efectuada por LDD, e logo da denuncia efectuada pola comunidade de montes, o xulgado estimou non consideralo delito penal e remitiunos a presentar a demanda civil, actualmente en curso. Reclamamos 2119 €.

4. En relación co contencioso administrativo presentado pola Comunidade de Montes de Cumiar respecto aos lindes coa nosa comunidade de montes, foilles desestimado no xulgado de Pontevedra. Presentaron apelación en A Coruña.

5. En relación coa nave de Albelle, comunícase que faleceu este ano o noso avogado e tivemos que contratar un novo avogado en Pontevedra, que ten pendente presentarnos un estudo sobre a situación do heliporto.

6. En relación coa limpeza da cría de piñeiro en Rebordiños comunícase que o tractor do Servizo Forestal da Xunta de Galicia limpou 6 hectáreas das 26 previstas, e despois de ter unha avería quedaron en proseguir a limpeza cando se arranxe o tractor.

No punto quinto de rogos e preguntas, debátese sobre a problemática do vertedoiro da Encostada. Anímase aos comuneiros a denunciar calquera verquido ilegal. Só se admitirán terra ou pedras na zona ou zonas que se indiquen, baixo a autorización do presidente da comunidade.

Sen máis asuntos que tratar, dase por finalizada a asemblea xeral ordinaria, sendo as 18:00 horas do día 5 de abril de 2009.

A Comunidade de Montes Veciñais en Mancomún de Guillade convoca a todos os veciños comuneiros á celebración da Asemblea Xeral Ordinaria que terá lugar na Escola Unitaria de Guillade o día 5 de abril de 2009, ás 15:00 horas en primeira convocatoria, e ás 17:00 horas en segunda convocatoria, coa seguinte

ORDE DO DÍA:

1. Lectura e aprobación, se procede, da acta anterior.

2. Estado das contas.

3. Aprobación para solicitar subvencións

4. Admisión de novos comuneiros e comuneiras

5. Rogos e preguntas.

O pasado xoves día 19 celebramos o Día da Árbore no Coto da Pedreira, acto organizado pola Asociación Xuvenil e de Voluntariado Arrasta. Xuntámonos un montón de homes e mulleres, nenos, rapaces, maiores e máis vellos e plantamos uns cantos liquidámbar ao pé do miradoiro, e logo, un pouco máis arriba plantamos medio cento de piñeiros.

Todos traballamos segundo puidemos, uns facendo os buracos, outros plantando, outros carrexando auga para regar.

Despois do traballo viu a festa, e os cociñeiros prepararon un grande churrasco de porco, con chourizos. O viño non faltou, e tampouco o café e as rosquillas. Os nenos fartáronse de brincar, e máis dun subiuse na manta que os maiores lles tiñan preparada.

Sorte para as árbores, a ver se prenden e podemos seguir cuidándoas durante este ano.

A Consellería do Medio Rural vén de publicar axudas para o fomento das frondosas caducifolias para as comunidades de montes veciñais en man común (entre outras entidades), ata un valor máximo do 70% do investimento e 2397 € por hectárea, e en especies coma o castiñeiro, freixo, carballo, carballo americano, ameneiro, bidueiro, nogueira, etc.

É un bo momento para solicitar axudas para repoboar con frondosas os lindes con Uma, por ser unha zona propicia para estas árbores.

Podes obter máis información pinchando na imaxe superior

Hai un par de meses, os que se pretenden propietarios do monte onde está situado na zona do heliporto procederon pola súa conta a cortar os piñeiros que o rodeaban pola cara sur e oeste. A  Comunidade de Montes de Guillade denunciou o caso e interpuxo unha denuncia por furto, de carácter penal.

Publicouse o auto do Xulgado de 1ª instancia e instrución nº 1 de Ponteareas, polo que se procede ao arquivo do procedemento ao estimar que se trata dunha cuestión civil que excede do ámbito penal.

Remítesenos a que presentemos a correspondente demanda civil.

A continuación pódese ler o auto xudicial (vese completo pinchando sobre a foto)

O pasado día 4 de xaneiro, reuniuse a xunta rectora cos vogais presentes e o presidente informou sobre os seguintes asuntos:

. Tres madeireiros visitaron a zona de Albelle para valorar os piñeiros. A mellor oferta foi de 1.200 € por todos os piñeiros secos. Acórdase aceptar esa oferta e vender todos os piñeiros secos. Decídese non vender os piñeiros verdes de momento debido a que o seu prezo no mercado é moi baixo.

. Infórmase sobre a denuncia presentada no xulgado por delito de furto en relación coa venda duns piñeiros da comunidade de montes ao lado do heliporto.

. Vaise proceder á plantación de máis dunha hectárea de castiñeiro nunha zona lindante con Uma.

. O persoal de limpeza de montes da Xunta de Galicia limpou algunhas hectáreas de piñeiro na zona próxima ao coto dos Santos, e espérase que limpe algunhas máis.

O sábado, día 10 de xaneiro, visitamos a necrópole megalítica da Chan de Campo de Mouro. Nunha chan situada a 450 metros de altura, entre as parroquias de Mouricasdos e Guillade atópase un conxunto de mámoas espalladas nunha superficie relativamente pequena. As mámoas son construcións de pedra, edificadas en pequenos montículos sobre o nivel do terreo, e onde tiñan lugar enterramentos funerarios.

Hoxe en día só se localizan estes pequenos montículos, coas pedras pequenas que servían de sustentación á edificación, pero as pedras que formaban a mámoa xa foron retiradas ao longo do tempo polos habitantes do lugar, para darlle outros usos. Tamén houbo épocas (principalmente no século XVI) nas que sistematicamente foron violadas estas mámoas, realizando excavacións no lugar onde se levantaban, co obxecto de procurar presuntos tesouros que realmente non existían. Como moito atopouse algunha ferramenta da época ou algún pequeno obxecto xa moi deteriorado, pois a acidez do terreo non permitiu a súa conservación, e moito menos a dos restos orgánicos das persoas alí enterradas.

Xuntámonos ao menos unhas 50 persoas, con nenos e nenas incluídos. Esta foi a primeira gran excursión de Darío, que acaba de cumprir 4 meses, sempre ben arroupado e alimentado por súa nai.

Fixemos un percorrido circular duns 4 Km. Saímos de Campo de Mouro, subimos ata a Chan, onde vimos unha das mámoas máis visibles, xusto no linde coa parroquia de Guillade. O noso guía Rafa foi quen nos deu todas as explicacións pertinentes xusto dentro do cono de violación da mámoa, moi evidente.

Alí tamén nos contou que o nome de Campo de Mouro procede posiblemente do feito de atopárense aquí un importante conxunto de edificacións megalíticas. O carácter non cristiano destas construcións convertíaas en cousas de mouros, e de aí o nome.

Pasando ao monte de Guillade podíanse discernir algunhas mámoas máis. Despois regresamos ata o Coto dos Santos, onde existiu a capela de Santo Tomé, hoxe desaparecida. Este punto marca xusto o linde entre Guillade, Mouriscados e Cumiar.

Dende alí baixamos á zona da Chan pertencente a Mouriscados, onde Santi, representante da comunidade de montes de Mouriscados tamén nos deu unha pequena charla sobre o modelo de sustentabilidade para o monte que pretenden levar adiante.

Neste momento teñen unha explotación apícola e proximamente teñen previsto introducir porco celta, vaca cachena e cabalos.

Ao final colleunos a lúa

Podedes ver unha presentación completa das imaxes da excursión aquí mesmo

Coñecendo a necrópole megalítica da Chan do Campo do Mouro

O próximo sábado día 10 as organizacións e asociacións ADENCO, MZS e Galiza Nova, teñen previsto realizar un percorrido etnográfico pola "parte alta" de Guillade, é dicir: xa no límite coa  parroquia de Mouriscados, pertencente ao Concello de Mondariz.

Ao longo da visita que ten previsto partir da estación de autobuses de Ponteareas as 15:45, con dirección a Campo de Mouro -lugar de partida-, haberá charlas informativas sobre a riqueza patrimonial e natural dos diferentes lugares polos que discurra a marcha.

O Xulgado do contencioso-administrativo número 1 de Pontevedra desestima o recurso interposto pola comunidade de montes de Cumiar en relación cos lindes no Coto dos Santos.

Contra esta sentenza aínda cabe recurso de apelación.

Aquí pódese ver a sentenza completa, con data do 25 de setembro de 2008.