Montes de Guillade

 Onte domingo xuntámonos catro persoas na Cruz do Valado a iso das 10:00 da mañá: Montero, Xose, Cris e Carlos. Iniciamos o paseo a pé na zona da Rañó lindando con Uma, baixo o Coto das Pedreiras. Ía néboa pero a temperatura era agradable. Nesta zona aínda vimos os restos dos piñeiros desvastados polo lume de hai dous anos, e algún que outro eucalipto que ameaza con implantarse na zona. Entre o toxo que medra hai cría de piñeiro.

Seguimos andando polo camiño que linda con Uma, rumbo norte, e chegamos ao cruce que sube a Rebordiños. Unha boa costa, onde houbo que aminorar a marcha. Nesta zona esta  previsto plantar unhas tres hectáreas de castiñeiro despois do verán. Arriba chegamos ao cruce de Rebordiños. Aquí hai cría de piñeiros e algún que outro eucalipto novo.

Seguimos máis ao norte o camiño que vai ter ao marco que limita as tres parroquias de Uma, Guillade e Mouriscados. De aí ven outra forte subida, dirección oeste, por un camiño que fai de linde entre Guillade e Mouriscados, e ao fin del cruzámonos cun camiño que ven de Rebordiños e vai dereito a Mouriscados. Nesa zona hai varias hectáreas, ao menos tres ou catro, con piñeiro de uns poucos anos en bo estado.

Seguindo un pouco ao norte chegamos a outro marco que fai o linde con Mouriscados. Dende aquí e mirando ao oeste vemos o Coto dos Santos, aínda envolto na néboa, a medio kilómetro.

Ao pé do Coto dos Santos, temos unha plantación de castiñeiro dunhas 3 ou 4 hectáreas, agora en floración, que xa ten uns 15 anos, pero que lle custou moito arrancar para diante, e ao lado dela outra máis pequena de roble americano.

De regreso baixamos polo camiño que vai ter dereito ao Coto das Pedreiras, coas vistas do San Domedio á fronte. Á man esquerda dese camiño, na zona de Rebordiños, vimos moita cría de piñeiro.

Xa no Coto das Pedreiras descansamos e bebemos auga na fonte.

Baixamos pola Coalleira, chea de xestas de dous e tres metros de altura dereito á Rañó e á casa da Mari Luz. Non moi lonxe da casa atopamos un vertedoiro de escombros escondido ao pé do camiño. Hai que ir concienciando á xente que esa non é a solución, que o monte é como a nosa casa e hai que telo limpo.

Para rematar, aquí podedes ver unha presentación completa do itinerario con máis fotos.

E aquí temos as fotos localizadas sobre un mapa de satélite grazas a google maps.

chúzame

A xunta rectora da Comunidade de Montes Veciñais en Mancomún de Guillade ten previsto realizar unha excursión pola zona da Rañó e lindes con Uma, Mouriscados e Cumiar, co obxecto de valorar a situación actual do monte, clarificar os lindes coas parroquias veciñas, e recoller propostas de cara a un futuro próximo.

Invitamos a toda a comunidade e agradecemos a vosa participación. A excursión terá lugar o vindeiro domingo, día 22 de xuño, iniciarase ás 10:00 da mañá na Cruz do Valado, e volveremos para xantar na casa.

chúzame

O Día Mundial do Medio Ambiente conmemórase o día 5 de xuño de cada ano, para estimular a concienciación sobre o ambiente a nivel mundial, ademais de promover a atención e acción política. O lema seleccionado para O Día Mundial do Medio Ambiente 2008 é Deixa o Hábito! Cara a unha economía baixa en Carbono, e proponnos reducir a produción de CO2, principal causante do efecto invernadoiro e do quencemento glogal.

Na páxina do PNUMA (Programa das Nacións Unidas para o Medio Ambiente) atoparás máis materiais informativos, e algúns vídeos, coma este cunha canción de Sting (Fragile Planet) con imaxes e mensaxe.

Nos enlaces seguintes atópanse consellos para colaborar na mellora do medio ambiente:

Como podes controlar ti o cambio climático: baixa, apaga, recicla e anda.

Baixa a calefacción, apaga as luces que non necesitas, recicla os residuos e camiña ou vai en bici á escola; estas son algunhas das formas nas que podes axudar.Calcula as emisións de Carbono que podes aforrar

Para rematar temos uns xogos, para poñer a proba os coñecementos:

1. Para cuidar a illa de Honoloko.

2. Moitos máis xogos na web de Fundación Biodiversidad.

chúzame

Os colectivos Adenco, Galiza Nova e MZS presentan o segundo roteiro do programa Debrúzate que nesta ocasión levará aos asistentes pola parroquia de Angoares.

      A actividade terá lugar o próximo sábado 7 de Xuño, saíndo da Igrexa de Angoares, ás 17h, con participación libre e gratuita. O percorrido, dunha dificultade baixa e unhas tres horas de duración partirá da Igrexa de Angoares, unha edificación de estilo románico, única no País pola súa planta de cruz latina e ábside rectangular.

      Posteriormente, o percorrido seguirá pola beira do Río Uma, Lugar de Interese Comunitario, onde se poden observar até dez muíños, desfrutar dunha paisaxe de ribeira ben conservada e onde tamén destaca a Ponte do Cabalón, pola que pasaba unha vía romana.

Ademais, os petos de ánimas e o Castro de Angoares serán obxecto de visita e explicación, neste roteiro circular que pretende unir unha vez máis o noso patrimonio natural e cultural, dándoo a coñecer para que se protexa e máis neste caso, o de Angoares, unha parroquia ao pé do casco urbán de Ponteareas, case descoñecida para os veciños da Vila.
(Recollido en nota de prensa do BNG Condado)

chúzame

Un ano máis, as estradas da nosa Parroquia e do resto do Concello miraránse máis alteradas do habitual pola celebración do “tradicional” Rallye das Rías Baixas. Teoricamente o rebumbio terá lugar os días 30 e 31 de maio, pero desgraciadamente a maioría sabemos que as datas previas a esta celebración son días de grande axitación e perigo por culpa dos adestramentos de pilotos e de todo un exército de afeccionados “tuneados”, que tentando imitar aos seu ídolos da velocidade e o ruido, percorren as nosas estradas sen nengún tipo de control.

Ao marxe de cuestións tan “de moda” nestes días, como: a redución da contaminación, as campañas pola seguridade vial e as súas tentativas por evitar os accidentes de coche (cantos dos que estades lendo isto coñecedes a alguén que lamentablemente dunha ou outra forma sabe o que son as consecuencias tráxicas dos accidentes?), centrarei esta reflexión nun par de aspectos bastante frívolos en comparación co perigo que implica a velocidade ao volante: o deterioro que sufren as nosas estradas durante as probas e as toneladas de lixo que quedan acumuladas nas cunetas ano tras ano (xa por estratos), tiradas sen reparo polos afeccionados: latas, botes, bolsas, botellas, plásticos, vidros...

A todo isto, hai que lembrar os atropelos e sustos que xa se teñen producido con anterioridade, como motivo en grande parte do descontrol existente nos días previos. Feitos que xa fixeron que moitos veciños doutras zonas do Condado, fartos do acoso dos tolos polos rallies e ante a ausencia de medidas disuasorias por parte das “autoridades competentes” contra os adestramentos fóra do horario permitido ou practicados por condutores temerarios non profesionais, decidisen expresar o seu malestar con cortes de estradas e deseperadas tentativas de boicot.

Lonxe do que poidan pensar moitos, este escrito non pretende prohibir ou abolir a práctica deste “deporte” (?), tan só cuestionar os lugares, as formas, os tempos e os xeitos nos que tradicionalmente se ven desenvolvendo nas últimas décadas: atravesando núcleos de poboación practicamente a calquera hora do día ou da noite, con escaso (ou nulo) control da velocidade ou de, por exemplo, o ruído (a contaminación acústica tamén existe), deixando moi pouco beneficio ou contrapartida económica nas Parroquias pero moito nerviosismo (estar pendentes dos nosos nenos, das bicis, dos nosos maiores...), moreas de basura e inconvintes (estradas cortadas pola Organización que implican ter que dar grandes rodeos).

Asi pois, porque non temos porque vivir secuestrados sen poder saír das casas, desprazarnos con medo polas estradas ou cunetas (se as houbese) nin recoller o lixo dos demais, emprazamos desde este blog as Asociacións existentes en Guillade e no resto de lugares afectados por este tipo de eventos, a que esixan aos seus respectivos Concellos e autoridades competentes a toma das medidas pertinentes para evitar este tipo de problemas. Ou ben directa e persoalmente, ou conxuntamente coa Organización da Competición, presionándoa a velar polo respecto ao medio ambiente e pola seguridade dos que queremos vivir nun contorno tranquilo e seguro, e non nun circuito de carreiras que sempre acaba emporcallado e desfeito.

chúzame -

O vindeiro domingo, día 25 de maio, ás 16:30 horas da tarde, terá lugar a subida a pé a Cotodeira, na parroquia de Sabaxáns, e que inclúe unha visita guiada aos foxos da chan da Anduriña. É un acto cunha dimensión reivindicativa de cara a defensa do patrimonio natural e cultural deste monte onde se pretende a instalación dunha canteira.

chúzame

O próximo domingo 11 de maio a Comunidade de Montes de Arcos xunto a Consellería do Medio Rural, organizan unha xornada lúdica e divulgativa na zona da Picaraña, coa intención de por en valor o patrimonio natural deste emblemático lugar  de Ponteareas.

O roteiro comezará as 9:30 h. saíndo do Barrio da Serra (fronte ao “Restaurante Rías Baixas”, na N-120), posteriormente habrá un xantar popular as 14:30 (16 € adultos, e 8 € os cativos), amenizado por un grupo de música tradicional.

Para acadar máis información, ou inscribirse, pódese chamar ao seguínte número:

986 644 601

Aquí podedes ver o tríptico da convocatoria do roteiro: cara 1, cara 2.

chúzame

O pasado sábado 26 de abril, perto de medio cento de persoas de diferentes parroquias do Concello de Ponteareas, acudiron á chamada de apoio feita polas organizacións: ADENCO, GALIZA NOVA e ASOCIACIÓN XUVENIL MZS, para denunciar neste caso o proxecto de apertura dunha canteira nesta zona da parroquia de Ribadetea.

Nesta ocasión, os asistentes poideron coñecer da man dos guías que organizaron a camiñata, os restos megalíticos existentes neste entorno natural, destacando as mámoas e dólmenes datados entre o 5.000 e 2.000 antes de Cristo, como os da “Lomba do Carballo Escuro”, “O Castelo” ou a mámoa do “Alto do Marco”.

Este roteiro é un dos primeiros que estas organizacións ecoloxistas e xuvenís, teñen programados levar adiante por diferentes puntos da nosa Comarca, barallándose incluso a posibilidade de que moi pronto pasen incluso por Guillade co gallo de dar a coñecer a riqueza e valor do noso patrimonio natural e cultural.

chúzame

A Consellería de Medio Rural e a Universidade de Santiago desenvolverán no monte veciñal en man común de Mouriscados (Mondariz), parte dun proxecto de investigación e divulgación de xestión forestal sostible mediante sistemas de silvopastoreo, que pretende ser un sistema eficaz para a loita contra os incendios forestais.

A comunidade promoverá o pastoreo de especies como o cabalo de raza galega, a vaca cachena, que é a máis pequena do mundo, ou o porco celta.

O experimento consiste no uso de gando como "desbrozadora", alimentándose básicamente do pasto natural do sotobosque, reducindo así a cantidade de combustible e, polo tanto, o perigo de incendio forestal.

chúzame

Hai un par de semanas que se elixiu unha nova xunta rectora para a Comunidade de montes de Guillade. É tempo de recoller todas as propostas que calquera comuneiro ou comuneira queira presentar e valorar a posibilidade de levalas a cabo. Non importa que sexan máis ou menos viables, trátase de ter ideas onde poder escoller. A modo de exemplo podemos anotar:

1. Ter a disposición de calquera comuneiro/a que o solicite os Estatutos da comunidade.
2. Publicar anualmente e con suficiente antelación as contas da tesourería para coñecemento de todos os comuneiros/as.
3. Publicar un mapa con todo o terreo xestionado pola comunidade de montes e onde se indique con que recursos se conta en cada parcela: tipo de plantacións,...
4. Establecer prioridades para cuidar dos recursos existentes. Cómo atender ás tarefas de limpeza e organizar novas plantacións en parcelas elixidas. Priorizar cultivo de frondosas (carballo, castiñeiro, bidueiro...) e mesmo valorar o cultivo dalgunha froiteira (nogueira, cerdeira... e tamén maceira ou algo polo estilo).
5. Organizarse os comuneiros/as para cuidar de zonas concretas se non fose posible facelo por outros medios debido ás dificultades económicas. Cada barrio, dirixido por cada vocal, pode responsabilizarse do cuidado dunha parcela concreta.
6. Centrar os recursos e os esforzos en cuidar de parcelas de especial interese, e deixar outras superficies a monte se non se dispón de recursos suficientes para atender posibles plantacións.
7. Existen zonas onde ardeu o piñeiro existente e que agora está cheo de nova cría de piñeiro. Hai que concretar como se cuida desa nova cría, tipos de fileiras, espazo entre árbores...
8. Hai zonas de monte onde nacen algúns carballos. Poden cuidarse os que hai e desbrozar para que poidan asentarse.
9. Hai outras zonas, especialmente nos lindes con Uma e con outros montes propiedade dos veciños (cabadas...) onde o eucalipto comeza a invadir o comunal con cría nova. É conveniente eliminalos para evitar que se expandan de xeito incontrolado.
10. Ter presente que o lume é un inimigo cruel e temible e que temos que previr para que o día que veña faga o menor mal posible.
11. Resolver canto antes o contencioso de lindes con Cumiar así como a situación do heliporto.
12. Xestionar a mellora das pistas forestais, algunhas delas atópanse en estado intransitable para vehículos.

Para calquera outra proposta que se vos ocurra podedes enviar as vosas suxestións á seguinte dirección de correo electrónico xose.vidal@gmail.com e serán publicadas. Moitas grazas.

chúzame